குழந்தைகளைக் கொல்வது என்பது எதிர்காலத்தை அழிப்பது

வெடிகுண்டுகளுக்கு குழந்தைகள் பலியாவது ஏற்றுக்கொள்ளமுடியாது என்றும், குழந்தையின் வாழ்க்கைக்கு முன்பு வேறு எதுவும் மதிப்பற்றது, குழந்தைகளைக் கொல்வது என்பது எதிர்காலத்தை அழிப்பது என்றும் கூறினார் திருத்தந்தை பிரான்சிஸ்.

பிப்ரவரி 3 திங்கள்கிழமை வத்திக்கானின் கிளமெந்தினா அறையில் அவர்களை அன்பு செய்வோம், பாதுகாப்போம் என்ற தலைப்பில் நடைபெற்றுக் கொண்டிருக்கும்  குழந்தைகளுக்கான உரிமைகள் உச்சிமாநாட்டின் தொடக்கத்தில் பங்கேற்று உரையாற்றியபோது இவ்வாறு எடுத்துரைத்த திருத்தந்தை அவர்கள், வளமை மிகுந்த உலக நாடுகள் கூட குழந்தைகளுக்கான அநீதியிலிருந்து விடுபடவில்லை என்றும் எடுத்துரைத்தார்.

இன்றும் இலட்சக் கணக்கான குழந்தைகளின் வாழ்க்கை வறுமை, போர், பள்ளிக்குச் செல்ல இயலாமை, அநீதி சுரண்டல் ஆகியவற்றால் அடையாளப்படுத்தப்படுகின்றது என்றும், மிகவும் வறுமையான நாடுகள், போர் மற்றும் மோதல்களால் துன்புறும் நாடுகள் போன்றவற்றில் வாழும் சிறார் மற்றும் இளையோர் கடினமான சோதனைகளை எதிர்கொள்ளவேண்டியுள்ளது என்றும் கூறினார் திருத்தந்தை பிரான்சிஸ்.

வாழ்க்கையை தங்கள் முன்னால் வைத்திருப்பவர்கள் அதை நம்பிக்கையுடனும் நேர்மறையான அணுகுமுறையுடனும் பார்க்கத் தவறிவிடுவது அதிகரித்து வருகிறது என்று சுட்டிக்காட்டிய திருத்தந்தை அவர்கள், சமூகத்தில் எதிர்நோக்கின் அடையாளமாக இருக்கும் இளையோர் அதனைத் தங்களுக்குள் அடையாளம் காண போராடுகின்றார்கள் என்றும், இது கவலையையும் துயரத்தையும் அளிக்கக்கூடியதாக் இருக்கின்றது என்றும் எடுத்துரைத்தார்.

Comments are closed.