செப்டம்பர் 16 : நற்செய்தி வாசகம்

இஸ்ரயேலரிடத்திலும் இத்தகைய நம்பிக்கையை நான் கண்டதில்லை.

இஸ்ரயேலரிடத்திலும் இத்தகைய நம்பிக்கையை நான் கண்டதில்லை.

✠ லூக்கா எழுதிய நற்செய்தியிலிருந்து வாசகம் 7: 1-10

அக்காலத்தில்

இயேசு கப்பர்நாகுமுக்குச் சென்றார். அங்கே நூற்றுவர் தலைவர் ஒருவரின் பணியாளர் ஒருவர் நோயுற்றுச் சாகும் தறுவாயிலிருந்தார். அவர்மீது தலைவர் மதிப்பு வைத்திருந்தார். அவர் இயேசுவைப் பற்றிக் கேள்விப்பட்டு யூதரின் மூப்பர்களை அவரிடம் அனுப்பித் தம் பணியாளரைக் காப்பாற்ற வருமாறு வேண்டினார்.

அவர்கள் இயேசுவிடம் வந்து, “நீர் இவ்வுதவி செய்வதற்கு அவர் தகுதியுள்ளவரே. அவர் நம் மக்கள்மீது அன்புள்ளவர்; எங்களுக்கு ஒரு தொழுகைக்கூடமும் கட்டித் தந்திருக்கிறார்” என்று சொல்லி அவரை ஆர்வமாய் அழைத்தார்கள். இயேசு அவர்களோடு சென்றார்.

வீட்டுக்குச் சற்றுத் தொலையில் வந்துகொண்டிருந்தபோதே நூற்றுவர் தலைவர் தம் நண்பர்கள் சிலரை அனுப்பிப் பின்வருமாறு கூறச் சொன்னார்: “ஐயா, உமக்குத் தொந்தரவு வேண்டாம்; நீர் என் வீட்டிற்குள் அடியெடுத்து வைக்க நான் தகுதியற்றவன். உம்மிடம் வரவும் என்னைத் தகுதியுள்ளவனாக நான் கருதவில்லை. ஆனால் ஒரு வார்த்தை சொல்லும்; என் ஊழியர் நலமடைவார். நான் அதிகாரத்துக்கு உட்பட்டவன். என் அதிகாரத்துக்கு உட்பட்ட படைவீரரும் உள்ளனர். நான் ஒருவரிடம் ‘செல்க’ என்றால் அவர் செல்கிறார்; வேறு ஒருவரிடம் ‘வருக’ என்றால் அவர் வருகிறார். என் பணியாளரைப் பார்த்து ‘இதைச் செய்க’ என்றால் அவர் செய்கிறார்.”

இவற்றைக் கேட்ட இயேசு அவரைக் குறித்து வியப்புற்றார். தம்மைப் பின் தொடரும் மக்கள் கூட்டத்தினரைத் திரும்பிப் பார்த்து, “இஸ்ரயேலரிடத்திலும் இத்தகைய நம்பிக்கையை நான் கண்டதில்லை என உங்களுக்குச் சொல்கிறேன்” என்றார். அனுப்பப்பட்டவர்கள் வீட்டுக்குத் திரும்பி வந்தபோது அப்பணியாளர் நலமுற்றிருப்பதைக் கண்டார்கள்.

ஆண்டவரின் அருள்வாக்கு.

——————————————————–

அடுத்தவர்மீதான அன்பு!

பொதுக்காலம் 24ஆம் வாரம் – திங்கள்

I 1 கொரிந்தியர் 11: 17-26

II லூக்கா 7:1-10

திருவிவிலியப் பின்னணி:

தொடக்கத் திருஅவையில் இறைமக்கள் இல்லங்களில் கூடி வந்தார்கள். அவ்வாறு கூடிவரும்போது ‘அன்பு விருந்து’ ஒரு முக்கியமான நிகழ்வாக நடைபெற்றது. இந்த அன்பு விருந்தில் வசதி படைத்தவர்கள் தங்கள் வீடுகளிலிருந்து உணவை எடுத்துக்கொண்டு வந்து, அதை வறியவர்களோடு பகிர்ந்து உண்டார்கள்.

பணக்காரர்கள், ஏழைகள் என பலதரப்பட்ட மக்கள் இருந்த கொரிந்து நகரத் திருஅவையிலோ வசதிபடைத்தவர்கள் தங்கள் வீடுகளிலிருந்து கொண்டு வந்த உணவைத் தாங்களாகவே உண்டுவிட்டு, அதை நம்பி வந்த ஏழைகளைப் பசியோடு விட்டார்கள். இதை அறிந்த பவுல் அவர்களிடம், “நீங்கள் ஒன்றுகூடி வரும்போது நன்மையைவிடத் தீமையே விளைகிறது” என்கிறார். கொரிந்து நகரில் இருந்த வசதி படைத்தவர்களுக்கு அங்கிருந்த ஏழைகள்மீது உண்மையான அன்பிருந்தால், அவர்கள் தாங்கள் கொண்டு வந்த உணவைத் தாங்களாகவே உண்டிருக்கமாட்டார்கள். அவர்களுக்கு வறியவர்களுக்கு அன்பு இல்லாததாலேயே இப்படியொரு செயலைச் செய்தார்கள்.

Comments are closed.